منتديات أعز الناس - جرحـِي الـعـَاريّ

جرحي العاري ..
مدري بكى حلم.. مدري ليلة ٍ غبره
نسوني احباب.. ولا ضاعت اخباري

هي اتّـدبر.. أو اقفت مابها دبره؟
ليت الليالي.. تقدر غربة الساري

مدري من اللي.. من الثاني نفذ صبره؟
لا يازمن من هو البايع من الشاري؟

لا للوجه وجهك.. ولا النبرة هي النبرة
مدري ولكن طرى لك يا زمن طاري!!

ماني بجاهل على الشدات تختبره
تشتد ياوقت واصراري هو اصراري

بالقلب ما تعرف العبرة من العِبرة
وبناظري .. غيمة ٍ ما تمطر اسراري

خليت الاحزان بأقصى القلب منثبرة
ياكثر كذبي على نفسي وانا داري

قم ياقصيدٍ يعزي لا انتثر حبره
إليا حداني زماني تفزع اشعاري

وان بار فيّه رفيق ٍ كنت معتبره
اغلى من الروح ما نزّلت مقداري

والله لو رد هاك الحب من قبره؟؟
مارد له.. لين تبرد غلّتي ثاري!!

ماكل شق ٍ مداه السلك والابرة
ماكل عين تجاهل جرحي.. العاري

اما يقولون طاح الضلع من كبره
والايقولون ماهو للوطا ضاري

كل ٍ تكلم وكل ٍ خابر ٍ خبره
بكره يبين الصحيح .. ان سهّل الباري

البارحة ضقت واثر البارحة غبرة
مدري بكى حلم ولا ضاعت .. اخباري

شعر: مساعد الرشيدي