منتديات أعز الناس

صحت نجد على صوت النباح ولجّة الغربان
عوافي .. قربي منك الوساده وادخلي لحافك
كأنك ما تعوّدتي على التجريح والنكران
من اللي زادهم في ما مضى من لحم اكتافك
تغطّي .. ما عليك إلا الرضا ورعاية الرحمن
صياحٍ ما يساوي طلّتك من راس مشرافك
عليتي يا عماد الدين وجمرة شيمة الفرسان
كثير الظلم ما ضرّك ولا هو سرّنا انصافك
ولو كسب المعارك هرج سادوا غيرنا عربان
نبا سيف الحروف وما نبت في الحرب أسيافك
نَحَسْبْ إيران تكرهنا.. وكلّن في الهوى إيران
عسى يفداك من حبْ وعسى يفداك من عافك
متى يا قبلة الدنيا عرفتي الذل والحقران!؟
ومنهو اللي تجرّا يقهرك أو يكتف كتافك
تهاوى عرش كسرى وانتهت سطوة بني عثمان
وانتي مثل خشم طويق في عزمك وميقافك
أنا والله مدري وش تبي يا الثاير الزعلان
تظن بلادنا ترجيك!؟ أو إن شيوخنا تخافك!؟
تبي سلمان!؟ ناظر في السما كانك تبي سلمان
تخيب يديك ما طلته ولا طالوه أسلافك
صَحَتْ نجد على صوت العويل ولجّة الغربان
عوافي .. قرِّبي منك الوساده وادخلي لحافك

بدر بن عبد المحسن