يالله يامنشي حقوق السحايب
انت الوحيد اللي تسوق الهبايب
منك استمد العون يالفرد يالصمد
لوحال دوني في زماني سبايب
كم ضيقتن حلّت وعيت تنجلي
ألا بعون اللي يزيل العطايب
وانا سبايب ضيقتي ياجماعتي
هرج القفا لاروجوه القرايب
لو هو من الاجناب ماضاق خاطري
مار البلا بين القرايب عجايب
ماجاهم ألا الطيب مني واشوفهم
بعض السوالف يقلبونه طلايب
أحدن يقابلني ويخفي عداوته
وليارحل تسمع علومن غرايب
وأحدن كثير الحكي بس بغيبتي
حقده دفين ومن تنّصاه خايب
ياصاحبي عمر رفيقك تحدته
هرجه قفا تودع الشاب شايب
ماغير اكافحهم بشعري واردهم
سرّاي ظلما في سموم اللهايب
والله لولا الخوف والمنقود والحيا
اني لاقول ان القرايب نشايب
من غير قاصر بالنشاما هل الصخا
الحي واللي تعتليه النصايب
ماأعاشر الا الكفو وابعد عن الردي
وأهل الردى مالي معاهم صحايب
طبعي فلا انسى رفيقي لو أغتني
الطيب زين ومن تناساه عايب
الله يعز الحي والميت يرحمه
كم طيبن يبقى ولو كان غايب
يالله لاتقطع هل الطيب والكرم
ياغافر الزلات يرجيك تايب
وختامها عد ماهل وأنهمل
من مزنتن ساقه جزيل الوهايب
صلو على محمد نبي الملا
شفيعنا يوم اختلاف المصايب
:: عمر الشمري ::
|