بسم الله الرحمن الرحيم
السلام عليكم ورحمة الله وبركاته
نظف قلبك من الحقد وصف نواياك وصدقني بتعيش براحة ضمير
فيه مثل كانوا اجدادنا يقولونه
صف النيه ونم في البريه
ايام زمان كانوا الناس يعيشون بكل بساطه وما يعرفون حقد او كراهيه الا قله قليله
والسبب انهم كانوا مصفين نواياهم ويعذرون باقي الناس
الحين الحال تغير وزاد الحقد وزادت الكراهيه بين الناس وخصوصا الاقارب والجيران الا قله قليله الله يرحم الحال
يازين حياة اول ويا صفاء قلوب اجدادنا وجداتنا
ما يعرفون شي اسمه بلبس احسن من غيري ولا يعرفون شي اسمه حفلة زواجكم شينه
اول كانوا يلبسون لباس متقارب حتى الاغنياء كانوا ما يشوفون حالهم على غيرهم
كانت البساطه وعدم التكلف سمة حياتهم
كانوا يتساعدون ويسألون عن بعض ويصلون ارحامهم
في الوقت هذا لو تتعطل سيارتك مافيه احد يوقف يساعدك وعشان كذا حطت وكالات السيارات خدمة الطريق لأنهم عارفين انك بتتوهق لو تعطلت
ايه الله يرحم الحال
مدري العيب فينا والا في ظروفنا والا في قلوبنا اللي صارت كلها مليانه من هموم الدنيا ونسينا شي اسمه قبر ولحد ونسينا شي اسمه اسره واحده وقلب واحد ومجتمع واحد ودم واحد
الحين كل واحد صار شعاره ابغى اكون احسن من غيري في لبسي وفي بيتي وفي سيارتي ووو كل شي
النعمه زينه لكن البذخ والتفاخر راح يضيعنا ويباعد قلوبنا ويفرقنا
متى نقول زي الاولين لقمه هنيه تكفي ميه
وارجع اقول زي الاولين
صف النيه ونم في البريه
الله يرحم اجدادنا وجداتنا
أترك لكم حرية التعبير حول هذا الموضوع ودمتم في حفظ الرحمن