بسم الله
----------
- الو ابومساعد
زين الي الحين مانزلت ..خلاص خلاص انا جايك
ينفتح باب المكتب المجاور
-هلا هلا اجل موجود مامشيت
- هلا ياطويل العمر
العادة ....تعرف مااقدر اترك المكتب بدون ماادون المستندات
واشيك كلش
-الله يعطيك العافيه ماادري وش كنت اسوي من دونك ياابومساعد والله قدرك كبير ووجودك مخليني مرتاح ان حلالي بين ايدين امينه
- امر بغيت شي طويل العمر
- انا كم مرة قايلك لا تناديني كذا
انت بمقام الوالد
- لا مهما كان المقامات محفوظه
صحيح اني اعتبرك والله مثل ولدي بس حتى
انت راعي الحلال
والخير الي حنا فيه انا وعيالي من الله ثم انت
- بس فكنا من هالاسطوانه
...اقول انت منتب جيعان علي انا بموت من الجوع
- يخسا الجوع وانا ابو مساعد
وش الي خاطرك فيه
- هههههه..ماتقصر
- هاه وش رايك بجريش وشوية تشريب
- الله الله ....ايوا الله عاد لو علي الجريش شوية سمينه
والتشريب محاوط بحمسة بصل ولحمة حاشي ايبا كان تصير شي
- بس ولا طلبت شي
ومن ورا المكتب يسحب كيس عليه بعض النقشات التقليديه
ويدخل يدة ليخرج حافظتين صغيرتين نوعا ما ومعها ملاعق ومفرش بلاستيك وبعض المناديل الورقيه
وبابتسامة رسمت على وجهه المتفاجأ
- اقول هذي ماهيب كيس الا مغارة علي بابا
اقول هو صحيح الي انا اشمه
وبثقة
- اول علمني تبي الجلسه شعبيه والا تبيها على الطاوله
- الا والله مافيه احلا من الارض منها واليها
هات هات عطني ابفرش انا
وعلى سجادة صغيرة
تقابل رجل اربعيني كل مافيه يدل على مكانه كبيرة وهيبه وبأس
وامامه رجل عجوز باواخر الخمسينات تدل ملامحه على الوقار والثقه وتجاعيد وجهه على خبرات سنين حفرتها التجارب
- سم بسم الله وماهوب قدرك بس يقولون الجود من الموجود
- بسم الله ...والله ان الريحه ماهيب طبيعيه اجل جريش وتشريب لو اني طالبه ماحصل بهالسهوله بهالمكان
بس تدري يابومساعد لو اني داري كان تمنيت شي ثاني
-هذي ام مساعد احترتني على العشا ودرت مانيب جاي على وقت الدوا الا لزمت على العيال يجيبون لي أياه... تخبر الدوا لازم اخذه على وقته
- الله يخليها لكم ويخليك لعييلك تاج
ويعطيك الصحه وطولة العمر
وبعد مرور فترة بين احاديث وتناول طعام
- الحمدلله الله يكثر خيركم وتسلم ايدين ام مساعد علي هيك طبخ
- جعله مداخيل العافيه ..انت لو تطاوعني وتاخذ لك بنت حلال والله لتلقا هالطبخ واحلا ليل نهار قدامك
- لا لا خلاص جربنا حظنا من سنين وخلاص طوينا الصفحه
- بس مااظن ياولدي انها انطوت مادامك عفت بعدها العرس يعني مازلت تحاتيها تفكر فيها
- لا اله الا الله ...وش فيك اليوم علي اشوفك بعد هالعزيمه سليت سيفك علي
- هالحكي بقلبي من زمان وسبحان الله كل شي بوقته
- وتظن هذا وقته
- ماادري بس احساسي يقول ايه
وبمحاولة لتغيير الموضوع
- المهم انت خلصت شغلك خليني احطك علي طريقي
- لا لا انا تو باقي لي كم ورقه اسجلها
انت تيسر وخلك مني ابدبر عمري
- افا لا لا ماهوب معقوله تعشيني هالعشوه الكايفه واخليك
ماهوب قبول
الا ابجلس وبنطلب لنا كاستين شاهي من ابوعبدو اتوقع ماطلع لين الحين وبتساعد انا وانت
- لا تعطل عمرك ابد
- لا لا مافيها مشاور وهذا حنا طلبنا الشاهي وهذي جلسه
ويتحرك ابومساعد محاولا ترك كرسي المكتب احتراما لراعي الحلال
- لا تقوم اجلس بمحلك انا مرتاح كذا
انت كمل شغلك واذا ماعليك كلافه عطني من عندك ملف المناقصات ابي اشيك كم شغله
ويستغرقان كلا بعمله
وينسيان كالعادة الوقت
ليرفع رأسه يراقب ابومساعد لازال يكتب ويراجع بعض الاوراق
فيقف حاملا الملف واضعا اياه باحد الادراج
ويلتفت وهو يعدل شماغه
وهو بجانب ابو مساعد
- عطني اشوف وش هالاوراق الي تسجلها
- ابد هذي اوراق التوصيات والمساعدات لازم اسجلها تدري اليوم اول أثنين من الشهر واليوم كان شوي كثير العدد
- لا لا مايضر وانا اموصيك ماترد احد ابد
بس المهم الاسم ماابي احد ياخذ شي باسم واحد ثاني
- اكيد اكيد
حتي بسبب هالسالفه اليوم جا يمنا واحد هقوتي انه حول الثمنطعش شاب محترم جدا فيه كبريا وشموخ غريب بس تصدق مابغا ياخذ الفلوس والتوصيه بس عشان قلت له يعطيني اسم امه
وقف بغا يمشي بس للحظه الشاب الي معه أقنعه
- طيب ليش زعل يعني انه مايبي يقول اسم امه مستحي منه
- لا لا الي فهمته انه يقول ماله داعي ينعرف الاسم هي مساعده لوجه الله وش تبون بالاسم لازم الا هالمذله
اصلا بين انه جاي غصب وجهه يتلون والله انه رحمته
بس صراحه الولد جدا متربي
بس شكل الظروف حدته
- المهم انكم اخذتوا الاسم كامل والمستشفي الي بتسوي امه فيه العمليه
- اكيد كملت كل المعلومات المطلوبه منه وتاكدت منها لاني ماظنتي بيرجع مرة ثانيه ابد
- مايحتاج يرجع خلاص امشوا باجراءتكم انتم
- هو مايحتاج بس العادة الاغلب يرجعون يشيكون ويراجعون عليناويشوفون لستة الانتظار
يعني يتطمنون علي اننا ماهونا عن المساعدة
- لا لا وين انهون انا قايلك لك
لا ترد احد
انا من نويت هالسالفه وانا مخليها لوجه الله لين الله ياخذ امانته هذا حق ربي من الخير الي عطانيه
- الله يكثر خيرك ويجعله بميزان حسناتك
- اقول عطني خلني اساعدك
وين وصلت له
- خلاص ماعاد بقا الا اربع استمارات
عطني اول اسم عندك
|