مُعلقــــــة الراتــــــب
ماني متابع للسياسة والأخبار
ولا همني أوباما ولا فوز ماكين
ولا همني وش قال حسني وبشار
وما همني لو زادوا الهند والصين
وما همني لو سوق الأموال منهار
وماهمني لو كان خسروا ملايـين
ما همني الا راتبي ذا الشهر طار
كله صرفته يوم خمسة وعشرين
بعثرت مدخولي على يمين ويسار
وقعدت وعيالي نصفق بـكفين
1300 على طول فــ إيجار
و400 مصروف جوال في زين
و 1150 في شركة إعمار
قرض ٍ أخذته وشفطـوه الشياطين
و1100 تجديد وأتعاب سمسار
عندي استمارة مطوفة حول عامين
و400 فاتورة الماء والأنوار
حتى ولو كنّا للأنوار مطفين
وأما 800 بـسوي بها الكار
سيارة ٍجربا ثلاث وثمانين
لا شمة الراتب يجـيها كما الزار
تنفض مكينتها كما نفض بوكلين
وام العيال تصيح يا زوجي البار
هذا الشهر عندي في القصر عرسين
احتاج انا فستان من عشرة امتار
وأفصله يا فالح الراي بألفين
وأخر مئة بتروح في جيب كومار
الحارس الهندي عسى فاله الشين
ويقول ما تكفيه للفلفل الحار
زعلان يبغى فوقها زود خمسين
وزادت معاناتي مع زود الأسعار
أصبح مثل ما قيل طاق ٍ بطاقين
أزمة مسويها مداهن وتجار
وراحوا ضحيتها الضعوف المساكين
منحاش من نار ٍ وطبيت في نار
ويا ويل حظ اللي وقع بين نارين
وإن الجمل صابر على الضيم صبّار
وان طاح تكثر في جنوبه سكاكين
أبديت ما في الصدرمن هم واسرار
بأقولها واخلي الخافي يبين
يا شيوخنا لا لا تغضون الأبصار
صار المواطن يشكي العسر والدين
وانتم به ادرى ياطويلين الأعمار
بالله عليكم شوفوا الوضع بالعين