منتديات أعز الناس - عرض مشاركة واحدة - المنفي على كرسي الأعتراف ●•·

09-16-2013, 08:20 PM

اقتباس:

المشاركة الأصلية كتبت بواسطة همس المحبه

وهذه عوده خفيفه لك أخوي ..

أجد في بعض أنتقااداتك ما يقنعني ويشد أنتباهي رغم وجود شئ من التعصب باالأراء والتمسك بها .. أرجو تقبل رأي بصدر رحب ^_^

سؤالي لهذا اليوم << مطوله الأخت بترجع ثاني ههههههههههههههـ

أبي رأي جهاد في مدى حرية المرأه المطلوبه في مجتمعنا السعودي ..؟

هل أنت من مؤيدين لقيادة المرأه.؟

متى يحتار فكرك وعندها من تلجأ له لتشاوره ..؟

مامواصفات شريكة حياة جهاد التي يريدها ..؟
..

أهلا وسهلا بكِ في أي وقت وأنا أرحب دايما بالأسألة من أي شخص حتى في حياتي الواقعية .
بخصوص تمسكي بالآراء وتعصبي لها فهو تمسك حتى يثبت الدليل لدرجة إني قبل فترة لقيت مقالاتي القديمة اللي نشرتها أيام كنت طالب في الجامعة في منتديات مختلفة ولقت قبول عند معظم الناس ومع ذلك رفضت أعيد نشرها لأني لقيت إنو أفكاري أتغيرت كتير بعد كل دي السنين ودا شي طبيعي للي يعرفوني كويس ويلاحظوا إنو أنا مريت بتغيرات فكرية كتيرة مع وجود بعض الثوابت في حياتي زي إخلاصي لعلم النفس هههههههه ورفضي فكرة إني اكمل حياتي العلمية أو المهنية في مجال آخر وأنا أعتبر نفسي باحث عن الحقيقة حتى لو كان معنى كدا أهدم كل اللي بنيتو وأرفض كل اللي اتعلمتو وعشان كدا صرت في نظر ناس كتير شخص شكاك ومرتاب وكل ما في الأمر إني أدور عالصواب ثم الأصوب وهكذا لحد ما أوصل للحقيقة مع إنو الموضوع دا لا نهائي إلا إني مصر أكملو للآخر .

أبي رأي جهاد في مدى حرية المرأه المطلوبه في مجتمعنا السعودي ..؟
عجبني السؤال صراحة وقعدت ادور في الغرفة واطالع في الكتب وافكر في اجابة مناسبة والحلو انك حددتي المجتمع السعودي بدقة وكأنك كدا بتسهليلي المهمة وبصراحة يعني الموضوع يحتاج اكتر من مجرد اجابة سطحية سريعة اعتقد انو سؤالك دا ممكن يكون بحث في علم الاجتماع وعشان اجاوبو اعتقد احتاج لوقت طويل وكلام كتير (على اساس انك دحينة مختصر الاجابة هههههه ) وأنا راح أحاول أختصر قدر المستطاع وأقول رأيي بصراحة إنو حرية المرأة السعودية أو المرأة في مجتمعنا السعودي لازم تكون نفسها الحرية في أي مكان في العالم وما أقصد "مظاهر الحرية" اللي نشوفها في العالم حاليا إنما أقصد الحرية "اللي مفترض تكون موجودة " وعشان ابسط الفكرة اكتر خليني أقول إنو حرية المرأة السعودي ينبغي أن تكون في مكانها الصحيح بدون تعدي على حقوق أحد وبدون انتقاص من حقوقها ومن أهم وابسط حقوقها حقها في تقرير مصيرها وفي اختيارها لطريقة حياتها كيف حتكون هل حتعيش لوحدها أو تتزوج وهل حتشتغل ولا تقعد في البيت وايش نوع الدراسة اللي تفضلها ومين هو الشخص اللي راح تتزوجو يعني أمور كتيرة هي وحدها صاحبة القرار فيها مو أحد تاني يفرض عليها قراراتو ووصايتو بشكل ظالم وجائر وقبل كم يوم كتبت على تويتر ( معظم الرجال يحاربون "حرية المرأة" للحفاظ "على ملكيتهم لها" أو يدافعون عن حقوقها "لاضافتها إلى قائمة ممتلكاتهم " أو الانتفاع بها ) وكلامي دا عام على جميع سكان العالم ما أخص بيلو المجتمع السعودي لوحدو انما دي ظاهرة عالمية مع الأسف واتمنى أكون وضحت فكرتي بالقدر المستطاع وأعتذر عن الإطالة .

هل أنت من مؤيدين لقيادة المرأه.؟
الموضوع ما يخصني عشان اكون مؤيد أو معارض القضية هي قضية المرأة وهي صاحبة القرار تبغا تسوق تبغا تركب وغيرها يسوق هي حرة وعن نفسي اكره السواقة وافضل اركب على اني اسوق .

متى يحتار فكرك وعندها من تلجأ له لتشاوره ..؟
بحسب الموضوع أنا اكاديمي واحب التخصص يعني لو احترت في موضوع اقتصادي فحدور على احد من معارفي لو خبرة ودراية بالاقتصاد أما لو الموضوع متعلق بالجوالات فاروح لأخويا الكبير لأنو لو خبرة فيها ومجرب نص الجوالات اللي في السوق ماشاء الله عليه وفي الغالب اروح للعم قوقل وما يقصر معايا صراحة كريم ويديني اجابات لأشياء كتير لأني بصراحة ما احب الحوجة لأحد ههههههه أفضل اعتمد على نفسي في أموري الخاصة ومع ذلك ما انسى اخد رأي أبو داود الله يحفظو برضو ما استغني عن آرائو برضو .

ما مواصفات شريكة حياة جهاد التي يريدها ..؟
الدبلوماسية تقول في دي الحالات ارد واقول ما بفكر في الزواج حاليا ههههههه وهو فعلا انا كل همي اخلص دراستي ولسه قدامي الدكتوراة وبعدينا يحلها ربي اما بالنسبة لفتاة أحلامي فمواصفاتها بسيطة يعني أهم شي ما تكون شبههي من باب تحسين النسل ههههه وكمانا ما يهمني مستوى التعليم المهم تكون زكية وتفهم ان شاء الله حتى ما تعرف تقرا ولا تكتب وبرضو يهمني تكون طموحة وتكون صاحبة قضية مو عايشة سبهللة يعني وبعد كدا تجي شوية مواصفات تقليدية زي انها تكون حنونة وطيبة ورقيقة وما أنسى أقول إنو لازم تتقدر تتحملني وتتحملي طباعي الغريبة وبالنهاية لازم أفكر بعد دا كلو وأنا ايش حقدملها في المقابل يعني طالب أشياء كتيرة فلازم أفكر انا ايش حقدم مقابل دا كلو وهل اللي حقدمو حيناسبها باختصار المسألة في الزواج أصعب من مجرد مواصفات في تصوري وعلى رأي الاستاذ الكبير أنيس منصور الله يرحمو " الزواج صعب لأنو ارتباط بين اتنين عرفوا بعض لفترة قصيرة وحيعيشوا مع بعض فترة طويلة "
مرة تانية اعتذرب وبشدة عن التطويل في الإجابة أنا أحب أفصل اجاباتي شوية عشان ما يصير سوء فهم وأهلا بيكي في أي وقت وبأي سؤال تحبيه .