10-07-2009, 04:12 PM
|
#1 | |
|
| عضو نشيــط |
|
قصه حقيقيه تؤلم القلب
 بسم الله الرحمن الرحيم أنا عبدا لله والحين انا راح اقص لكم قصتي وش صار معاي فيها من اولها لاخرهااا انا طبعا من هواياتي التصوير والدراجات الناريه واكثر شيء احبه واموت فيه الدراجات الناريه طبعا ذوات العجلتين المهم : انا موظف حكومي وراتبي قليل جدا لانو ماعندي شهادة زي الناس شهادتي ثانوي وعندي دورتين حاسب آلي المهم انا احلم اني اشتري الدباب حلم حياتي يكون عندي واحد المهم جلست اجمع اجمع اجمع لحد 10 شهور واستلفت من الوالد حوالي 14 الف ريال واشتريت الدباب بالخوذه والجاكيت حقه بـ 30 الف ريال المهم كان اليوم اللي اشتريته فيه كان يوم الثلاثاء وكان بكره دوام رحت ودخلت الدباب جوات البيت (الحوش) ورحت ونمت على طول على شان اصحى للدوام واجي من الدوام وطبعا يوم الأربعاء يعني له ماعندي بكره الخميس شيء اجازة الاسبوع المهم رحت للدوام انتظر انتظر والله اطول يوم دوام في حياتي لاني كنت ابي اطلع علشان اركب دبابي حبيب قلبي اللي كنت احلم فيه من 6 سنوات ممكن اكثر انا كنت احبه من كنت صغير بس واحب اقولكم انو كان عندي غيره بس كانت مو مثل اللي اشتريت الاخير الاخير كانه سياره ماشاء الله المهم طلعت ورحت للبيت وتغديت ونمت شوي <<<ياكثر نومك خخخخ المهم صحيت المغرب وانطلقت لبيت ولد عمي واتصلت عليه وقلت له اطلع انا عند الباب وهو مايدري اني اشتريت دباب حبيت اخليها له مفاجاة طلع لي كانت عيونه مغمصه خخخخ وجلس يحك عيونه قال متى اشتريته ؟؟؟؟ قلت امس قالي ليه ماقلت لي قلت حبيت اخليها مفاجاة    قال اهااا المهم طلعنا مع بعض وهو ماكانت معاه خوذه الخوذه حقته كانت في البيت حقنا هو كان عندة قبل دباب المهم رحنا لبيتنا في شبرا خخخخ وهو بيتهم في العقيق مشواااار لو رحت لمكة اقرب خخخخ ويوم وصلنا لبيتنا حولنا وجبت له الخوذه حقته وجلس يصورني شوي بعدين انطلقنا واتصلت على شباب كنا نعرفهم من زمااااان اصحاب دبابات وطلعنا معاهم في القروب وتمشينا مع بعض وطبعا الكل كان يرقم انا والله العظيم مارقمت ولا فكرت اني ارقم انا كان همي كله الطلع والاستمتاع بالدراجة وهو بصراحة هواتي واحبه الى اليوم والله وبعدين خلص يوم الأربعاء ورحنا وتعشينا وبعدها تفرقنا وقالي ولد عمي تعال نوم عندي في البيت احسن علشان بكره نطلع من العصر قلت اوكي ورحت ونمت عنده ويوم صحينا الا الوقت حوالي المغرب واليوم الخميس وصلينا الصلوات اللي فاتت وطلعنا وجلسنا ندور بعدين صلينا العشاء واتصلنا على القروب وتواعدنا وطلعنا معاهم ونفس الشيء كل يوم يرقمون اقسم بالله مايشبعون !!! وخلص اليوم وتعشيا سوا وبعدها قالو لنا بكره بعد صلاة الجمعة الوعد قلنا اوكي ورحنا لبيت ولد عمي طبعا ونمت عنده وبعدها صلينا الجمعة واتصلنا عليهم قالو تغدو بعدين نطلع رحت اانا وهو للمطعم وتغدينا وبعدها رحنا للمكان اللي كنا متفقين عليه اللي هو مخرج 7 الدائري الشمالي وبعدها طلعنا ورحنا للثمامة ونتمشى على طريق الثمامة وبعدين دخلنا الخططات وجلسنا ندور هناك شوي وقالي واحد منهم ابي اتسابق معاك قلت له اوكي نزلت ولد عمي وهو نزل اللي معاه ووقفنا جنب بعض بعدين قال لنا واحد فيه في عيونكم شمس ماراح تشوفون كويس قال خويي اللي بسوي معاه السباق لا لا عادي نشوف الشارع فاضي وانا كنت اشوف الشارع فاضي والله المهم انطلقنا بعدها صحيت وانا في الشميسي خخخخخ  وش صار ما ادري قلت لهلي وش صار وش جابني هنا قالو لي انت صدمت طفل قلت لهم مات ؟؟؟؟ قالو لا طيب هو وراح مع اهله بس جروح بسيطة وطيب الولد المهم اللي حصل انو الطفل توفى الله يرحمة من اول ماصار الحادث جلست تقريبا 4 شهور اهلي ماقالو لي انو الولد توفى لان حالتي النفسية تعبانه قالو لي بعدها انو الولد تعبان وفي المستشفى انا قلت لهم ابي ازوره قالو مايصلح هو في العنايه المركزة قلت لازم اروح ازوره المهم بعد عناء وبعد ماركبت السياره ابي اروح ابحث عنه قالو لي انو توفى رحمة الله عليه وكان عمره 7 سنوات انا الحين بقص لكم كيف صار الحادث ؟؟ واحنا في السباق طبعا انا كنت الاول كنت متقدم على خويي هو قالي خويي كيف صار انا كنت قدامة وبعدها يقول انو الطفل طلع عليك من التراب وطلع على الشارع وكان عاكس الطريق وانت ماشفتو ويقول حتى نور البريك ما اشتغل يعني صدمتو على سرعتي وطبعا كنت مسرع وبعد ماصدمت الطفل انا طرت فوووووق وطحت على كتفي وطاح الدباب فوقي وبعدها اتصلو على الاسعاف قال لهم راح اطول ممكن 20 دقيقه شافوني انتفض فكروني بموت وواحد قال لهم ودوة المستشفى ركبوة معاي المهم ركبوني معاه في السياره ونقلوني لاقرب مستشفى كان هو مستشفى المملكة ودخلوني عندهم ودخلوني العنايه المركزة وجلست عندهم يومين بعدين نقلوني للشميسي وبعد مانقلوني جلست عندهم تقريبا 3 ساعات ينتظرون الموافقه ما ادري من مين  انا كنت تعبان ولسه جاي من العنايه المركزة بس والله ماعندهم رحمة المهم دخلوني وجلست حدود الشهر عندهم وطبعا كنت في غيبوبه نقول 5 ايام وبعد ماصحيت من الغيبوبه مارجع عقلي لي والله كنت اتكلم بدون عقل ومارجع عقلي الا اخر خمس ايام كنت في المستشفى وبعدين طلعت البيت وحطو اهلي لي سرير تحت علشان انام عليه احسن من اطلع فوق لغرفتي بعدها بسبوع بدا الالم في يدي وكنت اصارخ من الأم والله العظيم كان الم ماقول الا جعلة تكفير وصبرت عليه صبرت قالي ابوي ممكن الكسر يجبر عندك علشان كذا الألم انا كان عندي كسر في الكتف  وبكره زااااااد الالم وجلس اصااارخ وقلت لهم اتصلو على الاسعاف ما اقدر اتحرك ولا امشي ولا اركب السياره اتصلو على الاسعاف وجاء الاسعاف ونقلني للشميسي وبعدها دخلوني الاسعاف واعطوني ابره مسكنه مع الورك وبعدها جاني الدكتور حق العظام قالي فين تقريرك حق الخروج من المستشفى اعطيناه وبعدها قال ما اقدر انومك لانك كتبو لك لازم ترتاح على السرير في البيت المهم كتب لي علاج ومافيه فايدة رحت لمستشفى الجامعي ودخلت عندهم على الاسعاف واعطوني ابره نفس حقت الشميسي لان حالتي كانت مره مو كويسه كنت مره اتالم وبعد ماعطوني ابره قالو بكره تجي فيه دكتور في عيادة التجميل اسمو قطان ممتاز للكتف المهم رحت للدكتور من بكره وقالي انت عندك مشكلة في الاعصاب وقالي احتمال اعصابك مقطوعة طبعا صرت اسوي علاج طبيعي ولسه يدي ماتتحرك ابدا مايتحرك فيها الا الاصابع الحادث كان في 23-1-2009 وبعد مرور 5 اشهر علىالحادث قررو يسوي لي عمليه نقل اعصاب المهم دخلت المستشفى وسويت العمليه          وقالو لي تحتاج سنه علشان تتحرك يدك ومع العلم اني جالس اكتب القصه والله بيد وحدة المهم العمليه بتاريخ 1-7-2009 طبعا العمليه عباره عن نقل اعصاب من الساقين وكانت اعصابي مقطوعة بعد ما خذو من الساقين حطوها في الرقبه وعلى عضله اليد وبصراحة ماشفت أي تحسن ماشفت الا الالم زاد والله وحتى ماصرت امشي كويس امشي بالعكاز والله  [ وهذي هي قصتي وكل همي في كتابتها ابي اصحاب الدراجات يبعدون عنها والله ثم والله مامنها خير وابي دعائكم لي في صلاتكم والسلااااام عليكم ورحمة الله وبركاته اخوكم عبدالله 25-7-2009 منقوله |
|
|
|
10-07-2009, 10:29 PM
|
#3 | |
|
.
|
شكراً لكِ غاليتي على هذا النقل المؤلم...
اسأل الله أن يحفظنا من كل سوء... في انتظار جديدك.. دمتِ بحفظ الرحمن |
|
|
|
|
10-09-2009, 03:30 PM
|
#8 | |
|
| عضو متألق |
|
لا إله إلا الله,, وما تدرى نفس ُ ُ ماذا تكسب غدا ً,,, وما تدرى نفس ُ ُ بآى أرض ٍ تموت
هكذا إرادة الله ولا راد لقضائه,, فاللهم أشفى هذا الشاب وجميع مرضى المسلمين ولعلها تكون عظة للشباب الطائش’’’ شكراااااااااااا للقصة |
|
|
|
|
10-10-2009, 04:40 PM
|
#9 | |
|
| إداري سابق |
|
يارب انك تشفيه وترجعه لاهله سالم يارب العالمين
عن جد قصه مؤثره بنت الأحساء لكي مني اجمل التحايا ودمتي بسعاده |
|
|
|
10-12-2009, 02:29 PM
|
#10 | |
|
الأسد الفضي
| إداري سابق |
|
لا حول ولا قوة إلآ بالله ..
الله يشفيه و يقومه بالسلامه .. اللهم إشفه شفاءا لا يغادر سقما .. مشكوره بنت الإحساء على القصهـ .. |
|
|
|
 |
«
الموضوع السابق
|
الموضوع التالي
»
العرض العادي
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| القلب الطيب .. و القلب الخبيث ... | ناصح أمين | نفحات إسلامية | 0 | 07-08-2021 08:53 AM |
| قصه حب حقيقيه همشها التاريخ | ثلاثيني رزة | حكايا | 5 | 09-26-2010 10:21 PM |
| قصه حقيقيه روتها الداعيه (لولوه الدويش) عن ابنتها افنان | algram66 | حكايا | 5 | 09-25-2010 04:17 PM |
| القلب هو القلب.. | **سارونه** | نفحات إسلامية | 6 | 06-02-2009 06:37 AM |
| .. !! حب العقل & حب القلب !! .. | ..!! الهوى الغايب !!.. | من أشعارهم | 8 | 05-18-2009 12:25 AM |
الساعة الآن 02:11 PM.