خطط للسيطرة على اطفالنا ... تفضلوا خططوا ونفذواااا

خطط للسيطره على اطفالنا


ملاحظه: الموضوع جهدي الشخصي غير منقول وراح اوضح في نهاية الموضووع المصدر



الاطفال نعمة عظيمه لكن مسؤولية كبيره وراح نسأل عنهم يوم القيامه ...



لذلك نسعى دائما لتربيتهم تربية جيده ... الفائده لنا ولهم ..



..مين مايبي عياله مؤدبين ما يعذبوه ويشرفوه في كل مكان ويكون عنده اطفال محبوبين وبالتالي واثقين من انفسهم وناجحين




موضوعي يتلخص في طرق عملية لتعديل سلوك الطفل الغير مرغوب فيه ومحاولة خلق جو من الهدوء اثناء ذلك ..



تعديل سلوكه بدون صراخ وضرب وعنف ..لانه ما راح يجيب نتيجه ولو جاب راح تكون مؤقته



الاطفال عادة يحتاجون مننا دائما دائما دائما اننا نتبه لهم ..



الطفل يحتاج الى هذا الدعم المعنوي من خلال انتباهك لتصرفاته الجيده لو ما انتبهت راح يستخدم معاك طريقة ثانيه وهي السلوك السيئ عشان تنتبه حتى لو كان انتباهك له عن طريق التوبيخ والضرب ..تخيلوا هالاطفال المساكين




تعزيز أي سلوك يحتاج مننا فقط الثناء ..واعرف انك لما تثني على السلوك راح يثبت اكثر في طفلك ...كأنها لوحة ثبتها بمسامير!!



الثناء له اساليب وطرق ومحاذير ...نتطرق لها بالتفصيل ان شاء الله



مستحيل ما يصدر من طفلك سلوك سيء وقتها يحتاج الطفل منك الانتباه السلبي (التجاهل – التطنيش بالعامي)



وكمان هالتجاهل له طرق ومحاذير ...



بعد ما تتقن متى تمدح ومتى تطنش .. راح تزيد السلوكيات الجيده



وتقل السلوكيات الغير جيده



وتحتاج كمان طرق تخلي طفلك متعاون اكثر في بعض الاشياء ..



مثل الطفل اللي يماطل في حل الواجبات ..



بعد ماتطبق كل الاساليب لو بقي بعض السلوكيات ما نفع معاها شيء راح تحتاج لخطوة اخيره تتعامل مع الطفل فيها



والطريقة الاخيره لو استعملت بإفراط افقدت فعاليتها ...



التربيه بحرررر وكل يوم نتعلم شيء جديد .. يعني لا تبخل على نفسك وعلى اطفالك بتعلم طرق تربويه جديده عليك ممكن تفيدك اكثر وتخلي حياتك اكثر هدوء مع اطفالك





يتبع لنتطرق للموضوع بالتفصيل ..

للامهات فقط ...اعتقد الاباء لن يهمهم هالموضوع
نكمل

الخطوة الاولى :



اكتبي ... لاتقولي يوووووو هالخطوة مهمه اكتبي في دفتر عندك مش في الموضوع


اكتبي سلوكيات طفلك اللي تحبيها منه


وسلوكياته اللي ماتحبيها بس ممكن تتحملي القليل منها


وسلوكياته اللي ما تطيقيها ولاتبين تشوفينها ابداااااااا









الاقسام الثلاثه راح تشتغلي عليها


الاول راح تزيديه وتثبتيه في طفلك


والثاني راح يقل


والاخير راح تطبقي معاه خطوات وضع الحدود



تخيلي يوم نظفتي البيت بالكامل وطبختي طبخه متعبه واستقبلتي جارتك ومالقيتي ولاكلمة شكر ولا امتنان من احد
محد قال ياه البيت يفتح النفس ولا احد قال يعطيك العافيه على هالطبخه الحلوة
ولا جارتك قالت معليش جيتك بدون موعد
بيكون يوم كئيييييييييييب بمعنى الكلمه الطفل زي كذا واكثر يحتاج مننا ثناء وانتباه واهتمام




وهذا مايحتاجه القسم الاول من السلوكيات




الانتباه الايجابي
الثناء
التشجيع
التقدير
الشكر
ابداء الاهتمام






عناصر الثناء حتى يكون فعال اكثر من مجرد كلمات:


امدحي السلوك مو تمدحي الطفل


يعني بدل ماتقولي (انت رائع) قولي عملك رائع


الوقت يكون بعد السلوك مباشرة


تكون عينك بعينه وانتي بتتكلمي


يكون مستوى جسمك بمستواه انزلي له واجلسي


تعابير وجهك ممكن تكون اقوى من الكلام ابتسامه عريضه مثلا


نبرة الصوت لازم تعبر عن فخرك بعمله


كلماتك لازم تكون قصيره وواضحه يفهمها الطفل


تجنبي يكون مدحك فيه أي ملاحظه او حتى كلمة لكن


تجنبي يكون مدحك فيه أي نوع من المقارنه باطفال اخرين


تجنبي المدح المقرون بالتميز على بقية الاطفال زي لما تقولي (انت افضل رسام في فصلك )


هذه النقطه وقعت فيها للاسف ... نتائجها ان الطفل يحس ان نجاحه قائم على الاخرين ويحس انه لازم يكون الافضل عشان يرضيك وهو بالفعل ماراح يقدر يكون الافضل دائما لذلك يصاب باحباط عندما يعاني مرارة الفشل ...



(كنت اقول لبنتي انتي افضل رسامه في العالم ..انتي احلى بنت في العالم ...الخ
لاحظتها ماتتقبل الخسارة ولا تتقبل المركز الثاني ابداااا ولما تخسر في لعبه مثلا تصاب باحبااااااط وتبطل تلعب ...مدري هذا من اثر كلامي لها او لا ... اكتشفت هالشي في الاجازة الصيفيه



نرجع لموضوعنا


مايكون المدح مقارنه مثل (انتي حصلتي على درجات حلوة زي اختك الكبيره) بلاش تقارنيها باحد لا باختها ولا بنت الجيران ...



اغلب الاباء حتى لو كانوا يمدحوا اطفالهم فهم يمدحوهم بعد ماينجزوا مهمه .. وهذا زين بس الطفل يحتاج اكثر


امدحي حتى السلوك البسيط .. امدحي حتى لو حاول بس انه يسوي شيء زين



امدحي لما يلبس بجامته بدون ماتقولي له


امدحي لما يلبس جزمته حتى لو غلط


امدحي لما يجمع العابه


امدحي لما يلعب مع اخوانه بدون مشاجرة


امدحي لما يجلس بهدوء يرسم او يلعب


امدحي لما يتكلم بهدوء


امدحي عندما يتوقف عن سلوك ما تحبيه




اذا طبقتي هالطريقه راح يحاول الطفل يزيد من فرصته للحصول على انتباهك الايجابي وراح يحس بالتقدير من جانبك والارتياح
راح يتعاون معاك ويقل الضغط الاسري المعتاد




سأكمل غدا بإذن الله

يعطيك العافية على هالموضوع الرائع .
في إنتظار جديدك

ننتقل الان الى التجاهل وهو مايحتاجه الجزء الثاني من السلوكيات





تخيلي انك في حفله وتتكلمي مع وحده عن ابنك وايش عمل في المدرسه وتبدأ هالانسانه اللي تكلميها تطالع بعيد عنك تبتسم لك وتهز رأسها طبعا تتجاهل قصتك
ايش راح تعملي على طول تختصري السالفه او توقفي كلام او تغيري السالفه وتسأليها عن شيء ..




ايش سويتي هنا ؟



لما حسيتي بالتجاهل غيرتي اسلوبك ...
هذا بالضبط اللي راح يصير مع طفلك لما تتجاهلي تصرفاته السيئه ..
ما اقولك تجاهلي طفلك لا تجاهلي السلوك اول مايوقف عن السلوك السيئ امدحيه



التجاهل يعني مافي أي تعبيرات عن غضب او أي شعور



التجاهل يعني انك تشغلي نفسك بأي شيء ثاني غير طفلك امسكي كتاب



طالعي التلفزيون



ابعدي عن الطفل ولاتطالعي فيه



ولاتخليه يشوف على وجهك علامات الغضب (هذا بحد ذاته انتباه )



واحنا نبي نوصل للطفل ان سلوكك هذا لايثير اهتمامي



مثلا يبكي طفلك بصوت مزعج ويتكلم وانتي مو فاهمه ومنزعجه



قولي( ماراح اكلمك الان اهدأ عشان اعرف ايش تقول) هذه الخطوة تسمى اعلان التجاهل




واتركيه لين يهدأ



لو هدأ شوي وبدأ يتكلم حتى لو لسا يبكي مو مشكله قولي شكرا انك هدأت عشان اعرف ايش تقول ...




هذه النقطه اتذكر مره سمعتها من الدكتور ابراهيم الخليفي باسلوبه كانت اروع واتذكر يومها سميناها انا وزوجي شخصية الجدار ...خخخخخخ




هالطريقه مو سحر يابنات لكن راح تقل التصرفات شوي شوي




يعني اليوم يبكي طفلك 10 دقائق بعد فتره تقصر المده الى ان تتلاشى












احيانا تحسي ان التجاهل امر مستحيل



مثلا تكلمي بالتلفون بنتك تشد السماعه تبي تكلم



تطبخي و كل شوي احد يناديك وبنتك تمسك بارجولك وتبكي ااااااااااه



وقتها ركزي انتباهك على شيء ثاني غير سلوك الطفل المزعج





انتبهي لازم لازم تدربي نفسك على التطنيش



لانك وبكل بساطه اذا استسلمتي وصرختي على طفلك راح ترسخي السلوك عند طفلك

الان صرتي تعرفي متى تطنشي ومتى تمدحي وكيف ..
طيب ايش الطريقة المثاليه للسيطرة على اطفال كثيرين مجتمعين عندك مثلا لحفله
او اطفال الاقارب ..






بكل بساطه استخدمي اسلوب
الثناء/التجاهل
اثني على الطفل اللي يمتثل للاوامر بسرعه
وتجاهلي المتمرد
ثناءك على الطفل المطيع كل واحد باسمه ... ومافي داعي تقارني المتمردين باالمطيعين
مثلا ( ممتاز يا احمد وضعت جزمتك في المكان المخصص)
ولا تقولي ( لماذا يا خالد لم تضع جزمتك في المكان المخصص زي احمد )






يتبع ان شاء الله

نجي الان لطرق تجعل طفلك متعاون وتقلل من المواجهه معاه


الطريقه الاولى : عرض الخيارات







طريقة سهله .. مثلا


جاء وقت النوم ...تقولي للطفل أي بيجاما تبي تلبس الحمراء او الزرقاء ؟؟


راح يختار ..


الطفل هنا بيحس انه له شيء من السيطرة على الامر وراح يطبق بسهوله


طيب لو قال ماراح البس لا الحمراء والا الزرقاء ابي البس هذا البنطلون


لو اعطاك خيار ثالث ومقبول بالنسبة لك وافقيه


اما اذا مو مقبول


قولي خلاص انا راح اختار عنك .. البس الحمراء ..


اذا لبس اثني عليه ...


اذا ماطل كرري عليه الطلب مره ثانيه ..

الطريقه الثانيه : الابلاغ






هو انك تبلغي الطفل بانه بعد فتره محدده تبين ينتقل من سلوك وينتقل لسلوك اخر ..
مثلا
انتوا في الملاهي .. قولي لطفلك بعد 3 مرات لعب بنروح البيت ...
يصير الطفل متعاون اكثر

مثلا
احمد بعد 10 دقائق تروح تفرش اسنانك وتغسل يدك
ندى بعد 10 دقايق تروحي تنامي
وامدحي الطفل لما يمتثل للاوامر

الطريقة الثالثه الاتفاق المشروط :





مثلا


الطفل : ماما ابي العب برا في الحوش؟

الام : طيب بس بالاول جمع العابك ووقتها اسمح لك تطلع


او مثلا
الام: عبدالله اذا خلصت واجبك باخليك تلعب في الكمبيوتر

لا تخلي الاشياء اللي تغري الطفل فيها ماديه ابدااااا

ممكن الطفل ما يعجبه الاتفاق عادي اذا رفضه ...لان هالطريقه اسمها اتفاق
ولو اول مره تستخدمي مع طفلك هالاسلوب جربي في اشياء ممكن تتوقعي منه الرفض ..

الطريقه الرابعه :


جدول افضل السلوكيات



هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 576x794 و بحجم 43KB. اضغط هنا لمشاهدة الصورة بالحجك الطبيعي.



كلنا تقريبا نعرف هالجدول
نضع ست سلوكيات لا اكثر تبين طفلك يسويها بدون مماطله
اذا عمل السلوك حطي نجمه والا هم من النجمه هو المدح والتشجيع
نهايه اليوم او نهاية الاسبوع اجمعي عدد النجوم
مثلا تكوني حددتي من قبل اذا كانت اكثر من 15 راح اطلعك المنتزة
بعد فتره راح يتعود الطفل انه يقوم بالاشياء من غير ماينتظر النجمه
والمكافأت عموما انا ضد انها تكون مكلفه ..
ولو تكون طلعات ونزهات والذهاب للاصدقاء افضل من وجهة نظري الخاصه

الطريقه الخامسه : جزئي المهام الصعبه

يعني مثلا بدل ماتقولي لطفلك رتب غرفتك
لا
قولي تعال جمع المكعبات هنا
حط الدباديب هنا
جمع الاوراق وارميها
وهكذا
ممكن تستخدمي هالطريقه في حل الواجبات

يعني تقولي اكتب هالفقره وبارجع اشوف ايش سويت وامدحيه

ملاحظه :
على فكره اللي طفلها بطيء في حل الواجبات ويماطل ..
اذا خلص الواجب ممكن تمدحيه تقولي ماشاء الله خلصت بسرعه
ولو كان كبير وفاهم وعارف انك تبالغي قولي انت اسرع من امس ماشاء الله
كمان ممكن تقولي بحط المنبه بعد نص ساعه حاول تخلص قبل مايدق
وهذا على بقية السلوكيات اللي يماطلوا فيها عيالنا
( كنت اقول لاحد اطفالي ايش هاللكاعه بسرعه خلصني... خخخ)

يتبع ان شاء الله مع الجزء الاخير من السلوكيات وكيف نتعامل معه

نكمل

الجزء الاخير من السلوك يحتاج منا وضع الحدود

محمد رتب غرفتك

خالد حل الواجب

اسامه احفظ

ندى تعالي انتبهي لاختك الصغيره

(ترا مثال بس لو عندي هالجيش انتحرت)

خخخخخ كاننا في معسكر تدريبي ... يافلان اعمل ويافلان اعمل
بالله مو هذه اشكالنا تقريبا في البيت ...

لكن لما تكوني انسانه غير مباليه وتقولي يالله متى مايبغوا يذاكروا يذاكروا براحتهم
متى ماناموا براحتهم
صح ممكن اطفالك يعجبهم هالاسلوب وتحسي انك محبوبه اكثر
لكن راح ينتج عندك اطفال معتمدين على الغير دائما

اطفال متلاعبين
يفتقدون الى النظام

لذلك نحتاج احيانا لوضع حد لسلوكيات لاتحتمل

في البدايه لازم تكوني جربتي طريقة الثناء/التجاهل السابقه

بعدها راح نستخدم اساليب العقاب

وترى لما تعاقبي وانتي من النوع اللي مايمدح الاطفال راح تلاقي سلوك طفلك السيء زاد

ليه؟

لان الطفل يحتاج للانتباه ولو مالقي منك الا الانتباه عن طريق الضرب عادي راح يستمر حتى يلفت انتباهك له بهذه الطريقه

بعد ماتعاقبي الطفل وخلاص وبدأ في سلوك جيد امدحيه خليه يحس فعلا انه عقاب عشان سلوكه مو كأن بينك وبينه ثأر

اذا كنتي تعاقبي وانتي ماتتقني التطنيش راح يضيع تعبك على الفاضي لازم تكوني تعرفي تتجاهلي الطفل وتجربيه قبل ماتعاقبيه

اذا استخدمتي اساليب العقاب بشكل مفرط راح تفقد فعاليتها

جربي كل الطرق السابقه مثل الاتفاق المشروط وغيره .. يعني خلي العقاب الحلقه الاخيره

طرق وضع الحدود
الطريقه الاولى : الاوامر



قولي للطفل الامر بجديه وحزم ولكن بدون غضب وعينك بعينه وناديه باسمه اذا جاء قولي شكرا وراح يستغرب وقولي الامر
(توقف عن قذف الحجاره الان)
الاوامر لازم تشمل السلوك الجيد
ولاتذكري السلوك السيء حت مايثبت اكثر في الطفل



يعني لا تقولي (لا تلعب في اغراض ابوك )
قولي (تعال خذ هذه اللعبه والعب فيها )








لاتقولي(توقف لاتربت على الرضيع بشده)
قولي (ربت على الرضيع بحنان )



وصيغة الامر ماتكون كأنها سؤال والا كأنك تشاورينه
يعني لاتقولي
هل تريد ان تستحم ؟
قولي
استحم الان من فضلك





الطريقه الثانيه : تكرار الاوامر









الاب / وقت النوم ياخالد..
خالد/يا بابا الساعه لسا 8
الاب / الساعه 8 وقت متأخر
خالد/ لا يابابا كل اصدقائي يشوفون هالكارتون قبل مايناموا
الاب / مو كلهم يجلسون الى 9 بعضهم ينامون 7
خالد/لا انا متأكد محد ينام 7
الاب/ طيب ممكن بس انت مو مثلهم
خالد/هذا مو عادل
الاب/يمكن انت تشوفه مو عدل بس انا وماما نقرر متى تنام لان الساعه 7 وقت جيد للنوم بالنسبه لولد عمره 9 سنوات
خالد/ طيب اذا قالت لي ماما اقدر اسهر شوي عادي؟



شفتوا خالد هنا بيطلع بحيل واساليب وجداااااال
ليه لان الاب وبكل بساطه استجاب له في النقاش











شوفوا الحوار هنا



الاب/ موعد النوم ياخالد
خالد/ يا بابا الساعه لسا 8
الاب / موعد النوم ياخالد
خالد/ يا بابا محد ينام من اصدقائي في هالوقت
الاب / موعد النوم ياخالد
خالد/ يابابا ايش معنى انا انام بدري
الاب/ موعد النوم ياخالد
خالد/ خلاص يابابا نوم نوم نوم طيب باروح انام
الاب/ شكرا لك ياخالد بعد 10 دقايق بأجي ابوسك خخخ (اتحدى ربعنا يسوونها)




هنا خالد ما قدر يلهي ابوه عنه بالجدال وكأن الاب يقول ما اسمع شيء منك لانه وقت النوم






الطريقه الثانيه:التحذيرات والعواقب

التحذير ماهو الا جمله لعقاب سوف تجازي به طفلك اذا لم يبدأ أو يتوقف عن سلوك معين
العقاب يكون :
حرمان مثلا من شيء


مثال :





عبدالرحمن يلعب كورة داخل البيت
الام : عبدالرحمن العب في الحوش ياحبيبي
يطنش عبدالرحمن ويضل يلعب
الام: تكرر عليه عليه الطلب

ويطنششش
الام: العب برا يا عبدالرحمن حالا
والا بآخذ منك الكورة لمدة ربع ساعه

هذا هو التحذير .
والعقاب لازم مايكون مدمر بالنسبه للطفل
يعني لاتحرميه من حفله لصديقه كان ينتظرها شهر كامل
ولاتحرميه من الملاهي اللي انتظرها اسبوع كامل
ولاتحرميه من البلاي ستيشن اسبوع !! كل ماكان العقاب قصير المده كان فعال اكثر
ولاتعاقبي وتهاوشي كمان لا
تحذيرك وعقابك يكون في هدوء


مثلا


احرميه من التلفزيون ربع ساعه

احرميه اللعب مع اخوه مثلا لو كانوا يتخاصموا لمدة ربع ساعه

الاستبعاد المؤقت:

طبعا تحذري الطفل عدة مرات قبل تطبيقه
هوعقاب فعال في أي مكان لكن لاتكثري من استخدامه
وحتى لما ماتكوني عارفه ايش تعاقبيه بالضبط طبقي هالطريقه
طبعا مناسبه للاطفال من 3 سنوات الى 12 سنه
اختاري مكان في البيت مثلا الدرج
او كرسي في زاويه (كرسي المشاغبين)
مايكون مكان مغلق ويكون مكان تحت نظرك
حددي دقيقه واحده لكل سنه من عمر طفلك يعني طفل عمره 4 سنوات استبعديه 4 دقايق
ممكن تستخدمي المنبه ولما يرن يعرف الطفل انتهى العقاب وخلاص انسي اللي صار لا تكشري كمان في وجهه خلاص تعاقب
ماينفع عقاب وتكشير كمان
او انتي تقولي بصوت محايد (انتهى العقاب تقدر تروح تلعب)
ولا تناقشيه كثير في سلوكه وتطفشيه بكثرة الكلام عن هالموضوع
اذا استمر في جلوسه في نفس المكان بعد مدة العقاب يعني طفشان ومتذمر حاولي تدخليه في جو الاسره من جديد
تعال يا احمد تساعدني في تحضير الاكل.؟
طيب لو الطفل رفض الجلوس اصلا؟
اجلسي ومعاك المنبه ... قولي متى ماجلست راح اوقت المنبه وتظاهري انه ماوراك شيء غير هالعقاب لاتتذمري ولاتتأففي
حتى لو جادلك وناقشك طنشي.. وعيدي عليه نفس الكلام..
ماجلس قولي راح ازيد المدة دقيقه كمان لو ماجلست ..
ممكن جدا ماينفع هالاسلوب مع كل الاطفال دوري اسلوب ثاني معاه
يعني تقولي : تجلس عشر دقايق والا مافي تلفزيون اليوم؟
اذا اختار العقاب الثاني نفذيه

اتمنى يكون الموضوع عجبكم

وهذا تلخيص بتصرف من كتاب

كيف تفوز في مشاكل البكاء والمشادات مع طفلك

طبعا كتبته بالعامي وماذكرت انه تلخيص لكتاب من البدايه

لو قلت لكم كتاب يمكن بعضكم مايقرأه

ولو بالفصحى ممكن جدا مو الجميع ينهي قراءة الموضوع

احببت ان اغير شوي في طريقة تلخيصي للكتب لتنال استحسان الجميع

في النهايه الكتاب كنززز

ولو ان لي بعض الملاحظات والاشياء الغير مقنعه بالنسبه لي ماذكرتها

مثل حل السلوك السيئ في الاجتماع الاسري

فكرته انه لما تجتمع الاسره تناقش مثلا فين بيروحوا نهاية الاسبوع يتطرقوا لسلوكيات الاطفال ويناقشوها
وانا اشوفه بصراحه ممكن يسبب احراج للطفل قدام اخوته وممكن يسبب الغيره او حتى معايره اخوانه له ..

ارحب جدا بأي استفسار او مناقشه

يعطيك العافيه على الموضوع المهم

يسلموووووووو اناملك عجبني المووضووع والاسلووب مشووق 0 لا عدمناك
الله يعطيك العافيه ويجـــــزاكـ بألف خيـــر