قصة بس الي مايفهم حجازي لايدخل << روعه

يقلكم يامحافيظ السلامة هادا وااااد يبيع حلاوة طحينيه قدام الدحديره اللي قدام بيتهم
المهم صاحبنا هادا كل يوم يتمرقع مع البنات اللي رايحه واللي جيه حقون الحارة
المهم مره وهوه يتمجغ مع وحده بنت كانت احلى بنات الحاره (( فتو )) المهم بدأ
هوه يتمرقع معاها ويديها كلام من اللي هوه ( ياحلو يالدو يالبنيه ياهريسه )
المهم والبنت ماادتلو وجه .
راح اخونا انقهر وركب راسو الف جني وجني وكل يوم يتمرقع ويتمجغ معاها مافي فايده
المهم الولد هادا بيااع الطحينيه حب فتووو
وتاني يوم وهيه معديه من قدامو الا وقف قدامها ويقلها
يافتو عورتي قلبي بحبك وانا جي اقلك انو نيتي سليمه وابغا اتزوج
أيش قولتي ؟؟
وقفت فتو وقالتلو هادا اللي ناقص اتزوج واحد حق حلاوة
طبعا يحقلها فتووو ابوهاا العم سرااج لي شنه ورنه في الحاره كلهااا وكل واحد يضربلوا حسااب
يقوم يجي واحد سفروت زي هادا يبغى يتزوجها .
المهم الولد هادا انقهر قام فكر في فكرة بنت كلب وراااح لعم سرااج بس ماطلب يدها
راح وقله ابغااا استلف منك فلوس وارجعلك هيه بهد شهرين
المهم وياخد الفلوس من هنا وفتحلوو دكان صغير يبيع في لدو وهريسه ومفروكه وكل انواع
الحلويات اللي تجيب السكر ويكسب ويفتح كزا مركز .
المهم ويرجع لعم سرااج ويردلو فلوسو ويقلو ابغا اتزوج بنتك
طبعا الواد هادا ساار من اكبر تجار الحلويات في البلد
قام عم سراج وافق وقام راح لفتووو يسألها رايها
قالت فتوو تبغا تشوفو وبس
ياحبيبي عينك ماتشوف الا النور اول ماشافتو قالتلو
ياولد يابكاش بطلك بهلله انتا بياع حلاوة طحينيه سرت تاجر ياهم الزمان
قلها اللي سار وقلها الواحد مو بحلاوته الواحد بفتاكتو

قامت ضحكت فتووو ضحكه من تحت لتحت ووافقت من كلام الواااد حقنا وعاشووا
في تباات وخلفوو ولد حليوة سموه نااار من قوة وصهلله العشق الي بيناتهم
والين يومنا دا وحلويات ابو نار مستمرة تجيب السكر للجميع .

ملاحظه

اذا في كلمة مو مفهومه ماعندي مانع اقلكم معناها