قصايد من ذهب ||

تعبـت اقـول لضيقتـي سهـود ومهـود
----------الـيـا مـتـى هالـعـذر بيـكـون عــذري
البـارحـة يــوم اكـثـر الـعـالـم رقـــود
----------عادت علـي اللـي تجـي منيـن مـدري
الضيـقـة الـلـي كــل مـاراحـت تـعـود
----------مكـانـهـا مـابـيـن قـلـبــي وصــــدري
نـاسٍ تنـام مدهـنـة فــي دهــن عــود
----------ونـاسٍ تـنـام مدهـنـة بـزيـت مـقـري
لاواهـنـي الـلـي حـلالـة مــن الـــذود
----------تسعيـن وضحـى كـل ماضـاق يسـري
يـســج مـعـهـا كـــل مـاهـبـت الـنــود
----------يتبع مسيـل السيـل فـي القـاع يجـري
ماهوب مثلي من اقرب الناس مجحود
----------الله يسـامـح مـــن طـعـنـي بـظـهـري
مـن راح ماكنـه علـى القـاع مـوجـود
----------مـايـدري انــه اول اسـبـاب كـســري
كـل ماطرالـي قلـت مــن قـلـت الـفـود
----------يالـيـت منـهـو راح مـاعــاد يـطــري
لـو تستحـي مـن فعلهـا ايامـي السـود
----------كان استحت مبطـي ولا طـال صبـري
قـدمـت بالـمـوجـود لـخـاطـر الـجــود
----------لـيـن التـفـت ولابـقـى شــي حـــدري
عطيت من عمـري ولا شفـت مـردود
----------يالـلأسـف للـنـاس ضيـعـت عـمــري
واذا افرحوا واجد علـى طيحـة العـود
----------هــذا دلـيـل انــه فـعـل شــي يـغــري
بوقـف لحالـي واتبـع الطيـب والـزود
----------اشـره علـي ان صغـر الوقـت كـبـري
مانـي علـى بعـض المخاليـق مـحـدود
----------امـــوت مـانـزَلـت لـلـنــاس قــــدري

تعبت أكذب على نفسي وأردد لأجلها : لا باس
تعبت أستنطق حظوظي .. عبث هذا المدى كله !
عبث هذا المدى ليلٍ أحس إنه عديم إحساس
تضايق مثل صدرٍ ضاق حتى مات من غلّه
يقولون السجن : غرفة وباب وثرثرة حراس
وعمرٍ من ملل وأحلام مخنوقة ومعتلّة
وأنا سجني ضلوع الصدر وإنسَ أصحابي الجلاس
وحيد والندم شخصِ يمون أكثر من الشلّة !
أحس إن الندم شيخٍ عزيزٍ ما إنحنى له راس
تعوّد يتبع المذنب بتالي الليل ويذله
لك الله يالشعور اللي غدا للصادقين لباس
مصيبة لاعتبرنا الصدق في هذا الزمن زلة
تعبت أكذب على نفسي وأردد لأجلها : لا باس
تعبت أستنطق حظوظي .. عبث هذا المدى كله !


محمد الاسمري

ارسلت لك :"خيّب غيابك يقيني"
...........ارسلت لي: "هذا الهوى \ متعب و شاق"
:
:
ومدري ضميره هالسهر محتويني
...........أو هو ضميرك صاحبي مابعد فاق

بكره تجيني! ... أيّ بكره تجيني؟؟
...........لو للمدى رجليـن.. مـ التفت الساق

يلعنــك ياحظ الدبـل فــي يديــني
........... كنك جناح الطير عـ الصد تواق

وانا جناحي... ذابــل بمعصميني
...........لا حـافل برجوى ولا طايق فراق

شي ٍٍ مبعـثـر بيـن بعضي وبيـني
...........وانا ارتبـْـني عُمُر ... بس ماراق

ماعاد ابيني بس قول انت ويني؟
...........او أيّنا اللي من سواليـفنا ضاق؟؟

ياني كرهتك \ بـــس باقي بعيني
...........ياني احبـك \ بـــس ماعاد تنطاق

ياني من الثنـتـين ينـْدي جبيــني
...........ياني بـهالقلبين محــروقه احراق

(حنـّا) تـجـَـمْعــنا .. أبيك .. وتبيني
...........وما جمعّتنا غير (حنـّا) والأوراق

ريح المطر

‎عاشق بداوه بس ما عندي نياق
‎ما عندي الا ذيب الايام عاوي
‎وبرد الشتا قاسي وانا بيتي رواق
‎ما بين متردد وما بين ناوي
‎واقف على حد الأمل تحت الآفاق
‎اقتل ملامح حيرتي بالرجاوي
‎وامنع بصبري دمعة الياس تنساق
‎عطشان بس اقول للناس راوي
‎كيف الورق يروى على يابس الساق؟
‎ارقد وأنا بطني من الجوع خاوي
‎واقول في الاشراق تقسيم الارزاق
‎واعيش لجلك في الصحاري خلاوي
‎مابه شجر ولا مطر بس براق
‎

عبدالله عبيان

الله من هــم بروحي ســـهجها
بخافى ضميرى فـى كنين الحشا لاج

احـر من نار تواقــد وهـــجها
منها خطر روحـى على ســلك ديباج

وعين عسى المولى يعجل فـرجها
يفوح ناظرهـا كما عــين هــداج

استرسلت للدمع من ما رهـــجها
غـــيظ يكظ عبارها مثل الامـواج

كـــم واحــد له غاية ما هرجها
يكنها لو هو للادنـين محــتاج

يخاف من عــوجا طــوال عوجها
هــرجـة قـفا يركض بها كل هـراج

يقضب عـليك المخطيه من حججها
حلو نباه وقلبه اسود من الصـاج

الله خلق دنيا وسـاع فجــجها
وعن ما يريب القلب لك كم منهاج

والرجل وان شـطت لياليك سجها
عســى تواليها تبشــر بالافـراج

محمد السديري

ابعتذر ... عن كل شيء ...
إلا الهوى .. ما للهوى عندي عذر ..
ابعتذر .. عن أي شي ..
إلا الجراح .. ما للجراح إلا الصبر ..
إن ضايقك اني على بابك أمرّ ...
ليلة ألم ... واني على دربك مشيت عمري وأنا
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
ا تصدقي ... ما اخترت أنا أحبك ...
ما احدٍ يحب اللي يبي ...
سكنتي جروحي غصب ...
ياحبي المرّ ... العذب ...
ليت الهوى وانتي ... كذب ...
كان اعتذر لك عن هواي ...
ما أقول أنا ... كوني معاي ...
ان ضايقك اني على بابك أمرّ ...
ليلة ألم ...
واني على دربك مشيت عمري وأنا ...
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
الله كريم .. حبك ... يكون ...
همي القديم ...
وجرحي القديم ...
والله عليم ... يا أحلى العيون ...
ان الفراق ... جزا الفراق ...
ابوعدك ... كان الطريق بيبعدك ...
بامشي الطريق ...
وكان الجحود بيسعدك ...
مالي رفيق ...
ابجمع أوراق السنين ... وأودعك ...
كان الفراق اللي تبين ... الله معك .

البدر

يا الله عفوك يوم تصفية الحساب
،،،، يومٍ حصاد لما زرعنا في السنين

يوم الحشر قرب ولا معنا زهاب
،،،، اليوم في الدنيا وبكره راحلين

نجني ذنوب ونرتجي عفو وثواب
،،،، وعلى نصر ربي لنا مستعجلين

تدرون ليه آمالنا كنها سراب؟
،،،، تدرون ليه النصر سيف الأولين؟

الأولين أعمالهم وفق الكتاب
،،،، قاموا عليه وباعوا الدنيا بدين

وحنا غفلنا بين ما لذ وطاب
،،،، والنصر سيفٍ ما يسله غافلين


بن فطيس

ودنا بالطيب لكن الدهر جحاد طيب
كل ما تخلص مع الناس كنك تغشها
يدك لامدت وفاء لاتحرى وش تجيب
كان جاتك سالمه حب يدك وخشها
كل ماشبيت نار المحبه مع حبيب
قام يسحل في مشاهيبها ويرشها
وكل ما واجهت لك فالزمن وجه غريب
مثل ماقال المثل دام تمشي مشها
وذمةٍ ماهيب تندار للحق المصيب
جعل قشاش الحطب لاسرح يقتشها


المغفور له باذن الله
سعد بن جدلان الاكلبي

الصمت حكمه والكلام اكثر من الـلازم غبـا
ما دام فالدنيـا مواقـف مـا يعبّرهـا كـلام

وانا اشهد اني مندفع من يـوم خفاقـي حبـا
الين لحّقني مع العالـم ومـع نفسـي مـلام

قمة غبائي يوم اردد (وصـل السيـل الزبـا)
واهد مرقب هيبتي وابني من أنقاضي غـرام

لا والله الا فـي أمـان الله والعشـق يهبـا
ولا ينقّص من روافـد عزّتـي ملـي جـرام

يعني على ما اظن يابلقيس مالـي فـي سبـا
وانتي على درب اليمن وانا نويت الدرب شام

ما اظن يبقى للمحبه بيـن شخصيـن غربـا
الا مشاعيب السهر تضرب على راس المنام

وانا عطيتك علم بيّن يـوم قلتـي وش تبـا
ساعة تربّعتي على عرش المحبـه والهيـام

فيصل السواط

يالضلوع اللي على قلبي تواما ريحيني ماحصل مني خطيه
الخطا والله في حق النشاما الرجال أهل الشدايد والحميه
الخوي منهم يضيق ولا يناما لين يدري وش بلا ضيقة خويه
تقعد الدنيا وتقوم ولا يضاما واحدٍ منهم وشمس الكون حيه
مثلهم يشري عزيزين المقاما مثلهم يفدى لو العمر الفديه
والا ذاك ان شاع ذكره وان تساما والله اني خابره راعي رديه
ذاك ياما شلت زلاته وياما قلت: عادي حتى لو يخطي عليه
صاحب وحقه على مثلي الاما ضاقت ايدينه فزعت له بيديه
كانت جروحي من طعونه تداما وكنت أحمل نفسي حمولٍ قويه
لين شفت العمر قدامه ترامى وصد عني مانشدني ويش فيه؟
يحسبني باتجاهل واتعاما مادرى اني حافظٍ ذيك الوصيه
يوم ابوي يقول والعالم نياما ساعةٍ فيها المواجع سرمديه
ياعيالي حتى لو صرتوا يتاما المعزه تورث النفس الغنيه
يالله اجعل منزله برد وسلاما واجعله في عدن يارب البريه
يوم راح وهرجته فيّه تناما يوم مات وذمته كانت بريّه


فهد المساعد